Sadhguru – ಸೊಜುಗಾದ ಸೂಜು ಮಲ್ಲಿಗೆ ಮಾದೇವ ನಿಮ್ಮ ಮಂಡೆ ಮ್ಯಾಲೆ ದುಂಡು ಮಲ್ಲಿಗೆ

Sadhguru – ಸೊಜುಗಾದ ಸೂಜು ಮಲ್ಲಿಗೆ ಮಾದೇವ ನಿಮ್ಮ ಮಂಡೆ ಮ್ಯಾಲೆ ದುಂಡು ಮಲ್ಲಿಗೆ
In last 24 hrs, we have a this new video from Sadhguru’s recent Kailash walk that has gone viral. There have been many requests to know more on the lyrics of the background song. Here I post the lyrics both in Kannada, (as in the actual song) and in English (below).
ಕನ್ನಡದಲ್ಲಿ:

ಮಾದೇವ, ಮಾದೇವ, ಮಾದೇವ, ಮಾದೇವ,

ಮಾದೇವ, ಮಾದೇವ, ಮಾದೇವ, ಮಾದೇವ,..

ಸೊಜುಗಾದ ಸೂಜು ಮಲ್ಲಿಗೆ ಮಾದೇವ ನಿಮ್ಮ

ಮಂಡೆ ಮ್ಯಾಲೆ ದುಂಡು ಮಲ್ಲಿಗೆ                    |ಪ| |೨|

 

ಅಂದಾವರೆ ಮುಂದಾವರೆ ಮತ್ತೆ ತಾವರೆ ಪುಷ್ಪ

ಚಂದಕ್ಕಿ ಮಾಲೆ ಬಿಲ್ ಪತ್ರೆ ಮಾದೇವ ನಿಮ್ಮಗೆ

ಚಂದಕ್ಕಿ ಮಾಲೆ ಬಿಲ್ ಪತ್ರೆ ತುಳಸಿ ದಳವ

ಮಾದಪ್ಪ ಪೂಜೆಗೆ ಬಂದು ಮಾದೇವ ನಿಮ್ಮ

 

ಸೊಜುಗಾದ ಸೂಜು ಮಲ್ಲಿಗೆ ಮಾದೇವ ನಿಮ್ಮ

ಮಂಡೆ ಮ್ಯಾಲೆ ದುಂಡು ಮಲ್ಲಿಗೆ

 

ತಪೋಳೆ ಬೇಳಗಿವಿನಿ ತುಪ್ಪವ ಕಾಯಿಸ್ಯಿವನಿ

ಕಿತ್ತಾಳೆ ಹಣ್ಣ ತಂದ್ಯಿವ್ನಿ ಮಾದೇವ ನಿಮ್ಮಗೆ

ಕಿತ್ತಾಳೆ ಹಣ್ಣ ತಂದ್ಯಿವ್ನಿ ಮಾದಪ್ಪ

ಕಿತ್ತಾಡಿ ಬರುವ ಬರುವ ಪರಷೆಗೆ ಮಾದೇವ ನಿಮ್ಮ

 

ಸೊಜುಗಾದ ಸೂಜು ಮಲ್ಲಿಗೆ ಮಾದೇವ ನಿಮ್ಮ

ಮಂಡೆ ಮ್ಯಾಲೆ ದುಂಡು ಮಲ್ಲಿಗೆ

 

ಬೆಟ್ಟ್ ಹತ್ತ್ಕೋಂಡ್ ಹೊಗೋರ್ಗೆ ಹಟ್ಟಿ ಹಂಬಲವ್ಯಾಕ

ಬೆಟ್ಟದ್ ಮಾದೇವ ಗತಿಯೆಂದು ಮಾದೇವ ನೀವೇ…

ಮಾದೇವ ನೀವೇ, ಮಾದೇವ ನೀವೇ,…

 

ಬೆಟ್ಟ್ ಹತ್ತ್ಕೋಂಡ್ ಹೊಗೋರ್ಗೆ ಹಟ್ಟಿ ಹಂಬಲವ್ಯಾಕ

ಬೆಟ್ಟದ್ ಮಾದೇವ ಗತಿಯೆಂದು ಮಾದೇವ ನೀವೇ

ಬೆಟ್ಟದ್ ಮಾದೇವ ಗತಿಯೆಂದು ಅವರಿಂದು

ಹಟ್ಟಿ ಹಂಬಲವ ಮರೆತಾರೋ ಮಾದೇವ ನಿಮ್ಮ

 

ಸೊಜುಗಾದ ಸೂಜು ಮಲ್ಲಿಗೆ ಮಾದೇವ ನಿಮ್ಮ

ಮಂಡೆ ಮ್ಯಾಲೆ ದುಂಡು ಮಲ್ಲಿಗೆ                      |೨|

 

ಮಾದೇವ ನಿಮ್ಮ ಮಂಡೆ ಮ್ಯಾಲೆ ದುಂಡು ಮಲ್ಲಿಗೆ

ಮಾದೇವ ನಿಮ್ಮ ಮಂಡೆ ಮ್ಯಾಲೆ ದುಂಡು ಮಲ್ಲಿಗೆ

 

in English:

Maadeva, Maadeva, Maadeva, Maadeva..aa…
Maadeva, Maadeva, Maadeva, Maadeva..aa…

Sojugada Sooju Mallige Maadeva Nimma
Mande Myale Dundu Mallige..
Sojugada Sooju Mallige Maadeva
Nimma Mande Myaale Dundu Mallige

Andavare Mundaavare Matte Thavari Puspa
Chandakki Maale Bilpathre Maadeva Ninge
Chandakki Maale Bilpathre Tulasi Dalava
Madappna Poojege Bandu Maadeva Nimma

Sojugada Sooju Mallige Maadeva Nimma
Mande Myale Dundu Mallige

Thappole Belagivni Tuppava Kaaisivni
Kittale Hannu Tandivni Maadeva Nimge
Kittale Hanna Thandivni Madappa
Kiththadi Baruva Parasege Mahdeva Nimge

Sojugada Sooju Mallige Maadeva Nimma
Mande Myale Dundu Mallige

Bett Hatkondu Hogorge Hatti Hambalavyaka
Bettad Maadeva Neeve Gathi Yendu Maadeva Neeve..
Bettad Maadeva Neeve,Bettad Maadeva Neeve,
Hatti Hambalava Maretaaro Mahdeva Nimma

Bett Hatkondu Hogorge Hatti Hambalavyaka
Bettad Maadeva Neeve Gati Yendu Maadeva Neeve..
Bettad Maadeva Neeve Gati Yendu Avarinnu
Hatti Hambalava Maretaro Maadeva Nimma

Sojugada Sooju Mallige Maadeva Nimma
Mande Myale Dundu Mallige..
Sojugada Sooju Mallige Maadeva
Nimma Mande Myaale Dundu Mallige

Maadeva Nimma Mande Myaale Dundu Mallige

Maadeva Nimma Mande Myaale Dundu Mallige

ಶಂಭೋ, Shambho

ದೇಶ ಮತ್ತು ಶಿಕ್ಷಣ – ೧

ರೋಹಿತ ಚಕ್ರತೀರ್ಥರವರ ಪ್ರತೀ ಬರಹದಂತೆ ಈ ಬರಹವನ್ನೂ ವಿವರವಾಗಿ, ಸರಳ ಪದಗಳಲ್ಲಿ ಜನರ ಮನಸ್ಸಿಗೆ ನಾಟುವಂತೆ ಬರೆದಿರುವರು. ಶೈಕ್ಷಣಿಕ ಕ್ಷೇತ್ರದಲ್ಲಿ ತೊಡಗಿಸಿಕೊಂಡಿರುವ ನಾನು, ಈ ವಿಷಯಗಳ ಕುರಿತು ನನ್ನ ಅಭಿಪ್ರಾಯಗಳನ್ನು ಸಂಕ್ಷಿಪ್ತವಾಗಿ ಇಲ್ಲಿ ಹಂಚಿಕೊಳ್ಳಲು ಇಚ್ಚಿಸುವೆ.

ಶೈಕ್ಷಣಿಕ ಕುಟುಂಬದ ಹಿನ್ನಲೆಯಿರುವ ಕುಟುಂಬ ನಮ್ಮದು. ಶಾಲಾ-ಕಾಲೇಜುಗಳನ್ನು ಪೂರೈಸಿದ್ದು ಧಾರವಾಡದ ಕರ್ನಾಟಕ ವಿಶ್ವವಿದ್ಯಾಲಯದ ಆವರಣದಲ್ಲಿ. ಸದಾ ಕಾಲ ಜ್ಞಾನಾರ್ಜನೆಯ ವಾತಾವರಣದಲ್ಲಿ ಬೆಳೆದ ನನಗೆ ಪಿಯುಸಿ ನಂತರವೇನು ಎಂಬ ಪ್ರಶ್ನೆ ಬಂದಿದ್ದು ಸುಮಾರು ೧೫ ವರ್ಷಗಳ ಹಿಂದೆ. ನಾನು ಇಂಜಿನಿಯರಿಂಗೆ ಹೋಗುವುದೆಂದು ನನ್ನ ನಿರ್ಧಾರ ಖಚಿತವಾಗಿದ್ದರೂ, ಅದರಲ್ಲಿ ಏನು ತೆಗೆದುಕೊಳ್ಳುವುದು ಎಂದು ಕೊನೆಯ ಕ್ಷಣದವರೆಗೆ ನಿರ್ಧರಿಸಲು ಆಗಿರಲಿಲ್ಲ. ಹಲವಾರು ಇಂಜಿನಿಯರಿಂಗ ಕಾಲೇಜುಗಳ ಪ್ರಾಂಶುಪಾಲರನ್ನು ಮತ್ತು ಪ್ರಾಧ್ಯಾಪಕರನ್ನು ಭೇಟಿಯಾಗಿ ಮಾತನಾಡಿದರೂ ನನಗೆ ನಿರ್ಧಾರಕ್ಕೆ ಬರಲು ಆಗಿರಲಿಲ್ಲ. ಕಾಲೇಜು ಮುಖ್ಯವೋ ಅಥವಾ ಕಲಿಯುವ ವಿಷಯ ಮುಖ್ಯವೋ ತಿಳಿದಿರಲಿಲ್ಲ. ಅದೆಷ್ಟು ಜನರೊಂದಿಗೆ ಮಾತನಾಡಿದರೂ ಈ ತಿಳುವಳಿಕೆ ಕೊರತೆ ಬಗೆಹರಿದಿರಲಿಲ್ಲ. ಬಹುಷಃ ಅದು ಎಂದೂ ಬಗೆಹರಿಯದ ವಿಷಯ ಎಂದೆನಿಸುತ್ತದೆ. ಅದಕ್ಕೆ ಮೂಲ ಕಾರಣ ಆ ವಯಸ್ಸು. ಸುಮಾರು ೧೭-೧೮ ವರ್ಷದವರಿದ್ದಾಗ ಮುಂದೆ ನಾನು ಹೀಗೇ ಆಗುವೆ ಅಥವಾ ಇದೇ ನನ್ನ ಜೀವನದ ಗುರಿ ಎಂದು ಹೇಳುವಷ್ಟು ಪ್ರೌಢತ್ವ ಇರುವುದಿಲ್ಲ ಎಂದೆನಿಸುತ್ತದೆ. ಆಗ ನಮ್ಮ ನಿರ್ಧಾರದ ಮೂಲ, ಉಚಿತ ಸಲಹೆಯನ್ನು ನೀಡುತ್ತಿರುವ ನಮ್ಮ ಮನೆಯ ಮಂದಿ, ಪಕ್ಕದ ಮನೆಯ ‘ಆಂಟಿ-ಅಂಕಲಗಳು’ ಅಥವಾ ನಮ್ಮ ದೋಸ್ತರರೂ ಕೂಡ. ಎಲ್ಲರೂ ತಮಗೆ ತಿಳಿದ ಅಲ್ಪ ಸ್ವಲ್ಪ ಮಾಹಿತಿಯನ್ನು, ಸ್ವಲ್ಪ ಮಸಾಲೆಯೊಂದಿಗೆ ಅರೆದು ಈ ವಿಷಯವನ್ನು ಕಲಿ, ಈ ಕಾಲೇಜು ಒಳ್ಳೆಯದು ಎಂದು ಹೇಳುವರು. ವಿದ್ಯಾರ್ಥಿಯ ಜೀವನದ ಇಂತಹ ಪ್ರಮುಖ ಘಟ್ಟದಲ್ಲಿ ಸೂಕ್ತಸಲಹೆಗಳನ್ನು ನೀಡುವ ವ್ಯವಸ್ಥೆಯಾಗಲಿ ಅಥವಾ ಸಂಸ್ಥೆಗಳಾಗಲಿ ನಮ್ಮಲ್ಲಿ ವಿಪುಲವಾಗಿ ಇಲ್ಲ. ರೋಹಿತರು ಲೇಖನದಲ್ಲಿ ಹೇಳಿದಂತೆ ಪಾಶ್ಟಿಮಾತ್ಯ ದೇಶಗಳಲ್ಲಿ ಇರುವಂತಹ  ಕೌನ್ಸಲಿಂಗ್ ತರಗತಿಗಳು ನಮ್ಮಲ್ಲಿಯೂ ಬಂದಲ್ಲಿ ವಿದ್ಯಾರ್ಥಿಗಳಿಗೆ ಹಾಗೂ ಪಾಲಕರಿಗೆ ತುಂಬಾ ಸಹಕಾರಿಯಾಗುವುದು.

ನನ್ನ ಪದವಿ ಟೆಲಿಕಮ್ಯುನಿಕೇಷನ್ ಇಂಜಿನಿಯರಿಂಗನಲ್ಲಿ. ನಮ್ಮ ತರಗತಿಯಲ್ಲಿ ಸುಮಾರು ೬೫ ಜನ ಇದ್ದೆವು. ಅದರಲ್ಲಿ ಕೇವಲ ಒಬ್ಬನೇ ಒಬ್ಬ ಟೆಲಿಕಮ್ಯುನಿಕೇಷನ್ ಕುರಿತಾಗಿ ಇದ್ದ ಕೆಲಸಕ್ಕೆ ಹೋದ. ಸುಮಾರು ೫೦+ ಜನ ಹೋಗಿದ್ದು ಸಾಫ್ಟವೇರ್ ಕಡೆಗೆ. ಒಂದಿಷ್ಟು ಸಹಪಾಠಿಗಳು ಸ್ನಾತ್ತಕೋತ್ತರ ವಿಧ್ಯಾಭ್ಯಾಸಕ್ಕೆ ವಿದೇಶಡೆಗೆ ಮುಖಾಮಾಡಿದರು. ಎಲ್ಲರಂತೆ ನಾನೂ ಕೂಡ ಮೊದಲು ಹೋಗಿದ್ದು ಸಾಫ್ಟವೇರ್ ಕಡೆಯೇ! ಕೆಲವೇ ತಿಂಗಳುಗಳಲ್ಲಿ ಸಾಫ್ಟವೇರ್ ನನ್ನ ಕ್ಷೇತ್ರವಲ್ಲ ಎಂದು ಅರ್ಥವಾಗಿ, ಅಲ್ಲಿಂದ ಹೊರಬಂದು ನಾನು ಹೊರಳಿದ್ದು ಭೌತಶಾಸ್ತ್ರದೆಡೆಗೆ. ಅಲ್ಲಿಂದ ಸುಮಾರು ಹತ್ತು ವರ್ಷಗಳ ನಂತರ ಎರಡು ಸ್ನಾತಕೋತ್ತರ ಪದವಿ ಪಡೆದು, ವಿಶ್ವದ ವಿವಿಧ ಪ್ರಯೋಗಾಲಯಗಳಲ್ಲಿ ಕೆಲಸ ಮಾಡುತ್ತ ಪಿಎಚ್ಡಿ ಮುಗಿಸಿ ಬೆಳಕಿನ ಕುರಿತು ಸಂಶೋಧನೆಯಲ್ಲಿ ನನ್ನ ಹಾದಿ ಕಂಡುಕೊಂಡಿರುವೆ. ನಮ್ಮ ಪದವಿಯ ತರಗತಿಯಿಂದ ಪಿಎಚ್ಡಿ ಕಡೆ ಮುಖ ಮಾಡಿದ್ದು ನಾನು ಮಾತ್ರ. ಶೈಕ್ಷಣಿಕ ವಾತಾವರಣದಲ್ಲಿ ಬೆಳೆದು ಬಂದದ್ದೇ ನನ್ನ ಈ ಹೆಜ್ಜೆಗೆ ಮುಖ್ಯ ಪಾತ್ರವನ್ನು ವಹಿಸಿದೆ.

ಇದೆಲ್ಲದರ ಹಿಂದೆ ಇರುವ ಮೂಲ ಕಾರಣ ನಮ್ಮ ಮನೆಯಲ್ಲಿ ನೀಡಿದ ಶಿಕ್ಷಣ-ಸ್ವಾತಂತ್ರ್ಯ. ನಾನು ಏನೇ ಕಲಿಯಲು ಹೋದರೂನಮ್ಮ ಮನೆಯಲ್ಲಿ ಬೆನ್ನೆಲುಬಾಗಿ ನಿಂತವರು ನನ್ನ ಪಾಲಕರು. ಶಿಕ್ಷಣಕ್ಕಾಗಿ ಅವರು ಕೊಟ್ಟ ಮಹತ್ವ ಅತ್ಯದ್ಭುತವಾದದ್ದು. ಅದಕ್ಕಾಗಿ ನಾನು ಅವರಿಗೆ ಸದಾ ಚಿರಋಣಿ.

ನನ್ನ ಹಲವಾರು ಗೆಳೆಯರಿಗೆ ಹೆಚ್ಚಿನ ವಿಧ್ಯಾಭ್ಯಾಸಕಕ್ಕಾಗಿ ಆಸಕ್ತಿಯೂ ಹಾಗು ಕ್ಷಮತೆಯಿತ್ತು. ಆದರೆ ಪದವಿಯ ನಂತರ ಅವರಿಗೆ ತಮ್ಮ-ತಮ್ಮ ಮನೆಯ ಜವಾಬ್ದಾರಿ ಹೊರುವ ಸಮಯವಾಗಿತ್ತು. ಇಂದಿಗೂ ನನ್ನ ಗೆಳೆಯನೊಬ್ಬನ ಮಾತು ನೆನಪಿದೆ, ಅವರ ಇಡೀ ಕುಟುಂಬದಲ್ಲೇ ಅವನೇ ಮೊದಲನೆಯ ಪದವೀಧರ. ಅವನನ್ನು ಆ ನಾಲ್ಕು ವರ್ಷ ಓದಿಸಲು ಅವರ ಮನೆಯಲ್ಲಿ ಪಟ್ಟ ಕಷ್ಟ ಅಷ್ಟಿಷ್ಟಲ್ಲ. ಇಂದು ಆತ ಇಷ್ಟವೋ / ಕಷ್ಟವೋ ಸಾಫ್ಟವೇರನಲ್ಲಿರುವವ. ಆದರೇ, ಅದೇ ಸಾಫ್ಟವೇರ್ ಅವರ ಒಂದು ಕುಟುಂಬವನ್ನು ಬಡತನದ ಬೇಗುದಿಯಿಂದ ಮೇಲೆತ್ತಲು ಸಹಾಯವಾಗಿದೆ. ನಮ್ಮ ದೇಶದಲ್ಲಿ ಎಲ್ಲರೂ ಸಾಫ್ಟವೇರ್ ಹಿಂದೆ ಬೀಳಲು ಇದೂ ಒಂದು ಮುಖ್ಯ ಕಾರಣ. ಸಿವಿಲ್, ಮೆಕ್ಯಾನಿಕಲ್, ಬಯೋಟೆಕ್, ಎಲೆಕ್ಟ್ರಾನಿಕ್ಸ್ ಅಥವಾ ಬೇರೇ ಯಾವುದೇ ಇಂಜಿನಿಯರಿಂಗ್ ಓದಿದರೂ ಸಾಫ್ಟವೇರನಲ್ಲಿ ಎಲ್ಲರಿಗೂ ಒಂದು ಸ್ಥಳ ಇದ್ದೇ ಇದೆ.

ನಮ್ಮ ದೇಶದ ಬಹಳಷ್ಟು ಇಂಜಿನಿಯರಿಂಗ್ ಕಾಲೇಜುಗಳಿಂದ ಹೊರಬರುವ ವಿದ್ಯಾರ್ಥಿಗಳು ನೇರವಾಗಿ ಕೆಲಸಕ್ಕೆ ಅರ್ಹರಲ್ಲ. ನಿಜ. ಆದರೆ, ಅದೇ ಪದವಿಧರರು ೬-೧೨ ತಿಂಗಳುಗಳ ಹೆಚ್ಚಿನ ಕಲಿಕೆಯಿಂದ ಕೆಲಸದಲ್ಲಿ ಜಾಗತಿಕವಾಗಿ ಬೆಳೆಯುವಷ್ಟು ಪ್ರಬುದ್ಧಿ ಪಡೆಯುತ್ತಾರೆ. ಕಳೆದ ೧೦ ವರ್ಷಗಳಲ್ಲಿ ನನ್ನ ಜೊತೆ ಇಂಜಿನಿಯರಿಂಗ್ ಕಲಿತವರಲ್ಲಿ ೫೦% ಹೆಚ್ಚು ಜನ ವಿದೇಶಗಳಲ್ಲಿ ಕೆಲಸ ಮಾಡಿದ್ದಾರೆ. ಇಂದು ನಮ್ಮ ಇಂದಿನ ಯುವಪೀಳಿಗೆಯ ಕ್ಷಮತೆಗೆ ಸಾಕ್ಷಿ. ಅದೇ ಸಮಯ ನಮ್ಮ ವಿಶ್ವವಿದ್ಯಾಲಯಗಳಲ್ಲಿ ಅಮೂಲಾಗ್ರ ಬದಲಾವಣೆಯನ್ನು ತಂದು, ಅಲ್ಲಿನ ಪರಿಸರವನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ಯುವ ಪ್ರಯತ್ನಗಳು ಶೀಘ್ರವಾಗಿ ಆಗಬೇಕಾಗಿವೆ. ದೇಶದ ಹಾಗೂ ವಿದ್ಯಾರ್ಥಿಗಳ ಪ್ರಗತಿಗೆ ಇದು ಅತ್ಯವಶ್ಯ.

ಇವುಗಳೆಲ್ಲದರ ಜೊತೆಗೆ ನಮ್ಮ ದೇಶೀ-ಶಿಕ್ಷಣ ಪದ್ಧತಿಯ ಪುನರ್ಸ್ಥಾಪನೆಯೆಡೆಗೆ ಹೆಜ್ಜೆಗಳನ್ನು ಇಡುವ ಸಮಯವೂ ಬಂದಿದೆ. ಮುಂದೊಂದು ದಿನ ಈ ಕುರಿತು ಬರೆಯುವೆ.

ಪಿಯುಸಿ ನಂತರ ಏನು ಎಂಬ ಪ್ರಶ್ನೆಗೆ ನೇರ ಉತ್ತರವಿಲ್ಲ. ವಿದ್ಯಾರ್ಥಿಯ ಆಸಕ್ತಿ ಒಂದೆಡೆಯಾದರೆ, ಭವಿಷ್ಯದ ಚಿಂತೆಯೊಂದೆಡೆ. ಇಂದು ನಮ್ಮ ದೇಶದಲ್ಲಿ ಸುಮಾರು ೩೦ ಕೋಟಿ ಜನ, ಒಪ್ಪೋತ್ತಿನ ಊಟವನ್ನು ಮುಂದೂಡುತ್ತಿದ್ದಾರೆ. ಸರಿಯಾದ ವಿದ್ಯಾಭ್ಯಾಸವೊಂದೇ ಜನರನ್ನು ಈ ಹಸಿವಿನಿಂದ ಪಾರು ಮಾಡಬಲ್ಲದು. ಇಂದು ಶಾಲೆಗಳಲ್ಲಿ ಮಧ್ಯಾಹ್ನದ ಊಟದ ಯೋಜನೆ ಮುಖಾಂತರ ಬಹಳಷ್ಟು ಮಕ್ಕಳನ್ನು ಶಾಲೆ ಬಿಡದಂತೆ ನೋಡಿಕೊಳ್ಳುತ್ತಿದ್ದೇವೆ. ಅದೇ ರೀತಿ ಇನ್ನೂ ಹಲವಾರು ಕಾರ್ಯಕ್ರಮಗಳನ್ನು ಕೈಗೆತ್ತಿಕೊಂಡು ಪಿಯುಸಿ ನಂತರ ಏನು ಎಂಬ ಪ್ರಶ್ನೆ ಮಾತ್ರವಲ್ಲ, ಹೇಗೆ? ಎಂಬ ಮಾರ್ಗವನ್ನೂ ನಾವಿಂದು ಕಂಡುಹಿಡಿಯಬೇಕಾಗಿದೆ.

ನಡುರಾತ್ರಿಯ ಬರಹ

ಕಳೆದ ಕೆಲವು ತಿಂಗಳುಗಳಿಂದ ಯುರೋಪ್ ಹಾಗೂ ಉತ್ತರ ಅಮೇರಿಕಾದ ಮಧ್ಯ ನಿರಂತರ ಓಡಾಟ ನಡೆಯುತ್ತಿದೆ. ಒಂದೆರಡು ವಾರ ಉತ್ತರ ಅಮೇರಿಕಾದಲ್ಲಿ, ನಂತರ ಒಂದೆರಡು ವಾರ ಜರ್ಮನಿಯಲ್ಲಿ. ಒಮ್ಮೆ ಅಮೇರಿಕಾದ ಪೂರ್ವಭಾಗವಾದರೆ, ಮತ್ತೊಮ್ಮೆ ಪಶ್ಚಿಮ ಭಾಗ. ಕಳೆದ ವಾರವೇ ಮರಳಿ ಬಂದ ನನಗೆ, ಈ ವಾರ ಕೆನಡಾ ಪ್ರಯಾಣದ ಸಮಯ. ಇಷ್ಟೆಲ್ಲಾ ಸುತ್ತುತ್ತಿರುವಾಗ ತ್ವರಿತ ಕಾಲಮಾನಗಳ ಬದಲಾವಣೆಯಿಂದ, ಜೈವಿಕ ಕ್ರಿಯೆಗಳಲ್ಲಿ ಸ್ವಲ್ಪ ಏರುಪೇರಾಗಿ ಆಯಾಸವಾಗುವುದು ಸಹಜ. ಈ ಸ್ಥಿತಿಗೆ ಆಂಗ್ಲ ಭಾಷೆಯಲ್ಲಿ ಜೆಟಲ್ಯಾಗ್ (jetlag) ಎನ್ನುತ್ತಾರೆ.

ಸುಮಾರು ಒಂದು ವರ್ಷದ ಹಿಂದೆ, ಸದ್ಗುರುರವರ ಈ ಬ್ಲಾಗನಲ್ಲಿ ಖಂಡಾತರ ಪ್ರಯಾಣದ ಕುರಿತು ನೀಡ ೪ ಸಲಹೆಗಳನ್ನು ಓದಿದೆ. ತದನಂತರ ಜೆಟಲ್ಯಾಗ ಸಂಪೂರ್ಣವಾಗಿ ನನ್ನ ಹಿಡಿತದಲ್ಲಿ ಬಂದು. ಈ ಸಲಹೆಗಳನ್ನು ಬಳಸಿ, ಕಳೆದ ವರ್ಷ ಕೆನಡಾದಿಂದ ಭಾರತಕ್ಕೆ ಪ್ರಯಾಣಿಸಿದರೂ ಯಾವುದೇ ರೀತಿಯ ಆಯಾಸ, ಏರುಪೇರು ಕಂಡುಬರಲಿಲ್ಲ. ಅಂದಿನಿಂದ ಈ ೪ ಸೂತ್ರಗಳು ನನ್ನ ಪ್ರಯಾಣವನ್ನು ಸುಲಭ ಹಾಗೂ ಸರಳಗೊಳಿಸಿವೆ. ಕಳೆದ ವಾರ ಜರ್ಮನಿಯ ವಿಮಾನಯಾನವಾದ ಲುಫ್ತಾನ್ಸಾದಲ್ಲಿ ಲಾಸ ಎಂಜಲೀಸನಿಂದ ಫ್ರಾಂಕ್ಫರ್ಟಗೆ ಬಂದೆ. ಆ ವಿಮಾನದಲ್ಲಿ ವಿಶೇಷವಾಗಿ ಕೇವಲ ಹಣ್ಣಿನ ಊಟವನ್ನು ಆಯ್ಕೆಮಾಡಿಕೊಳ್ಳಲು ಅವಕಾಶವಿದೆ. ಎರಡು ವಾರಗಳ ಹಿಂದೆ ಜರ್ಮನಿಯಿಂದ ಅಮೇರಿಕಾಗೆ ಹೋಗುವಾಗ ನನ್ನ ಹಣ್ಣಿನ ವಿಶೇಷ ಊಟವನ್ನು ವಿಮಾನದಲ್ಲಿ ಸೇರಿಸಲು ಮರೆತಿದ್ದ ಅವರು, ಈ ಬಾರಿ ಹಣ್ಣಿನ ಊಟದ ಜೊತೆಗೆ, ಸಸ್ಯಾಹಾರಿ ಊಟವನ್ನೂ ನೀಡಿದರು. ಸಾಮಾನ್ಯವಾಗಿ ಬೇಯಿಸಿದ / ಕುಡಿಸಿದ ಆಹಾರ ಪದಾರ್ಥಗಳನ್ನು ಈ ಖಂಡಾತರ ಪ್ರಯಾಣದಲ್ಲಿ ಸ್ವೀಕರಿಸದ ನಾನು, ಅಂದು ಏಕೋ ಏನು ಎರಡೂ ಊಟವನ್ನು ಮಾಡಿದೆ. ಊಟವೇನೋ ಚೆನ್ನಾಗಿತ್ತು, ಆದರೆ ಜರ್ಮನಿಗೆ ಬಂದಿಳಿದ ನಂತರ ಇಲ್ಲಿನ ಸಮಯಕ್ಕೆ ಹೊಂದಿಕೊಳ್ಳಲು ಸುಮಾರು ೨ ದಿನಗಳು ಬೇಕಾಯಿತು.

ನಮ್ಮ ಆಹಾರ ಪದ್ಧತಿಯನ್ನು ವಿವರವಾಗಿ ನೋಡಿದಾಗ, ನಾವು ಸ್ವೀಕರಿಸುವ ಆಹಾರ, ಸ್ವೀಕರಿಸುವ ಸಮಯ ಹಾಗೂ ಸ್ವೀಕರಿಸುವ ರೀತಿಯು ನಮ್ಮ ಜೀವನದ ಮೇಲೆ ಬಹು ಪ್ರಭಾವ ಬೀರುವುದು. ಈ ಮೂರು ವಿಷಯಗಳ ಸಮತೋಲನದಿಂದ ನಾವು ಕೈಗೊಳ್ಳಬೇಕಾದ ಕೆಲಸಗಳಿಗೆ ಸೂಕ್ತವಾದ ವಾತಾವರಣವನ್ನು ಈ ದೇಹದಲ್ಲಿ ಮೂಡಿಸಿಕೊಳ್ಳಬಹುದು. ಈ ಯೋಚನೆಯ ಮುಂದುವರಿದ ಭಾಗವೇ ಈ ನಡುರಾತ್ರಿ ಬರಹ ಪ್ರಯೋಗ. ಈಗ ಸಮಯ ಸುಮಾರು ರಾತ್ರಿ ೨.೩೦. ಇನ್ನು ಸ್ವಲ್ಪ ಹೊತ್ತಿನಲ್ಲೇ ಮುಂಜಾವು ಆರಂಭ, ತದನಂತರ ದಿನದಾರಂಭ. ಕೆಲಸ ಮತ್ತು ವಿಶ್ರಾಮಗಳ ಮಧ್ಯೆ ಸಮತೋಲನ ತರುತ್ತಾ, ಕೆಲಸದ ಕ್ಷಮತೆ ಹೆಚ್ಚಿಸುತ್ತಾ, ನಿದ್ದೆಯನ್ನು ಕಡಿಮೆಗೊಳಿಸುತ್ತಾ ಈ ಪ್ರಯೋಗ ಮುಂದುವರಿಯುವುದು.

ನಿದ್ದೆಯಿಲ್ಲದೆ, ಚೈತನ್ಯಪೂರ್ನವಾಗಿ ಸತವಾಗಿ ೩-೪ ದಿನಗಳ ಕಾಲ ಕೆಲಸದಲ್ಲಿ ವ್ಯಸ್ತರಾಗಿರುವವರನ್ನು ನೋಡಿರುವೆ. ಅವರಂತೆಯಲ್ಲದಿದ್ದರೂ, ೨೪ಗಂಟೆಗಳಲ್ಲಿ ಅತೀ ಹೆಚ್ಚು ಕಾಲ ಚೈತನ್ಯಪೂರ್ವಕವಾಗಿ ಇರುವೆಡೆಯೇ ಈ ಪ್ರಯೋಗದ ನಡೆ…

ಶಂಭೋ!

ಅನುಭವ ಮತ್ತು ವಸ್ತುಸ್ಥಿತಿ

does-the-law-of-attraction-really-workಹುಟ್ಟಿನಿಂದ ಇಲ್ಲಿಯವರೆಗೆ ನಮ್ಮ ಜೀವನದ ಅನುಭವಗಳು ಅಸಂಖ್ಯಾತ. ಅವುಗಳಲ್ಲಿ ಕೆಲವೊಂದು ನಮ್ಮ ನೆನಪಿನಲ್ಲಿರುತ್ತವೆ, ಆದರೆ ಬಹಳಷ್ಟು ಅನುಭವಗಳು ಕೆಲ ಕ್ಷಣಗಳ ಕಾಲ ಮಾತ್ರವಿದ್ದು, ನಿಧಾನವಾಗಿ ನಮ್ಮ ಸ್ಮೃತಿಪಟಲದಿಂದ ಮರೆಯಾಗುತ್ತವೆ. ಚಿಕ್ಕವರಾಗಿದ್ದಾಗ ಆಡಿದ ಆಟಗಳು, ಜಗಳಗಳು, ಇಷ್ಟ ಪಟ್ಟು ನೋಡಿದ ಸ್ಥಳಗಳು, ದೊಡ್ಡವರಾಗುತ್ತಿದಂತೆ ಮರೆಯಾಗಿ, ಹೊಸ-ಹೊಸ ಅನುಭವಗಳಿಗೆ ನಮ್ಮನ್ನು ನಾವು ತೆರೆದುಕೊಳ್ಳುತ್ತೇವೆ. ಇದು ನಮ್ಮ ಮನಸ್ಥಿತಿಯಲ್ಲಿ ಆಗುವ ಬದಲಾವಣೆ ಮಾತ್ರ.ವಸ್ತುಸ್ಥಿತಿಯನ್ನು ನೋಡಲು ಶಕ್ಯವಾಗದೇ,  ಕೇವಲ ಪಂಚೇಂದ್ರಿಯಗಳ ಮೂಲಕ ವಿಶ್ವವನ್ನು ನೋಡಲು ಪ್ರಯತ್ನಿಸುತ್ತಾ, ನಮ್ಮ ಮನಸ್ಸಿನಲ್ಲಿ ಅದಕ್ಕನುಗುಣವಾಗಿ ಮಸಾಲೆಯನ್ನು ಅರಿಯುತ್ತಾ, ನಮ್ಮ ಅರಿವಿಗೆ ಪರದೆಯನ್ನು ಹಾಕಿದ್ದೇವೆ ಎಂದೆನಿಸುತ್ತದೆ.

ಓ ಮಾನವನೇ, ಪಂಚೇದ್ರಿಯಗಳ ಸದ್ದಗಡಿಸಿ, ಅಂತಃಕರಣದಿಂದ ನೋಡುವಂತಾಗು…

ಶಂಭೋ!

ಚಿತ್ರ ಆಕರ: ಇಶಾ ಬ್ಲಾಗ್

ನನ್ನ ಇವಿದ್ಯಾಲೋಕ ಶಾಲೆ – ಮನಗುಂಡಿ

ಅಗಸ್ಟ ೯, ೨೦೧೬

ಕಳೆದ ಶೈಕ್ಷಣಿಕ ವರ್ಷದಿಂದ ಮನಗುಂಡಿ ಶಾಲೆಯಲ್ಲಿ ವಿಜ್ಞಾನ ಪಾಠ ಮಾಡುತ್ತಿರುವೆ. ಕಳೆದ ವರ್ಷ ೬ನೆಯ ತರಗತಿಗೆ ಪಾಠ ಮಾಡಿದ್ದೆ. ಈ ವರ್ಷ ಅದೇ ಮಕ್ಕಳಿಗೆ ೭ನೇ ಇಯತ್ತೆಯ ವಿಜ್ಞಾನ ಪಾಠ ಮಾಡುತ್ತಿರುವೆ. ದೂರದ ಜರ್ಮನಿಯಲ್ಲಿ ಕುಳಿತು ಸದೃಢ ಭವಿಷ್ಯ ಭಾರತದ ಪ್ರಜೆಗಳನ್ನು ರೂಪಿಸುವ ಈ ಶೈಕ್ಷಣಿಕ ಕ್ರಾಂತಿಯಲ್ಲಿ ಕ್ರಿಯಾಶೀಲವಾಗಿ ತೊಡಗಿಸಿಕೊಳ್ಳಲು ಅವಕಾಶ ನೀಡಿದ ಇವಿದ್ಯಾಲೋಕಕ್ಕೆ ಚಿರಋಣಿ.

ಕಳೆದ ವರ್ಷ ನಮ್ಮ ಮನಗುಂಡಿ ‘ಸಾಲಿ’ ಹುಡುಗರನ್ನು ಅವರ ಶಾಲೆಯಲ್ಲಿಯೇ ಎರಡು ಬಾರಿ ಭೇಟಿಯಾಗಿದ್ದೆ. ಮಕ್ಕಳ ಉತ್ಸಾಹ, ಆಸಕ್ತಿ, ಚೂಟಿತನಗಳೇ ಪಾಠ ಮಾಡಲು ನನಗೆ ಸ್ಪೂರ್ತಿ. ಅವರಿಗೆ ಪಾಠ ಮಾಡುತ್ತಾ ನಾನು ಕಲಿತ ವಿಚಾರಗಳು ಇನ್ನೂ ಹೆಚ್ಚು. ಅದರಲ್ಲೂ ಅವರು ಕೇಳುವ ಪ್ರಶ್ನೆಗಳು; ಪ್ರಾಯೋಗಿಕವಾಗಿ ವಿಜ್ಞಾನವನ್ನು ಅವರು ಅರ್ಥಮಾಡಿಕೊಳ್ಳುವ ರೀತಿ ನನ್ನನ್ನು ಬೆರಗುಗೊಳಿಸುತ್ತವೆ.

ಈ ವರ್ಷ, ಸ್ವಲ್ಪ ವಿಭಿನ್ನವಾಗಿ ಮಕ್ಕಳಿಗೆ ನಾವು ಬರುವ ಸೂಚನೆ ನೀಡದೇ, ನೇರವಾಗಿ ಭೇಟಿಯಾಗಲು ಹೋಗಿದ್ದೆ. ನನ್ನ ಜೊತೆ, ಹೊಸ ವಿಜ್ಞಾನ ಶಿಕ್ಷಕರಾದ ಸಂತೋಷರವರೂ ಸಹ ಬಂದಿದ್ದರು. ನಾವಿಬ್ಬರೂ ಜರ್ಮನಿಯ ಯೇನಾ ವಿಶ್ವವಿದ್ಯಾಲಯದಲ್ಲಿ ಪಿಎಚ್ಡಿ ಮಾಡುತ್ತಿರುವೆವು. ಇಬ್ಬರೂ ಜೊತೆಗೂಡಿ ಹೋಗಲು ದಿನ ನಿಗದಿಪಡಿಸಿದ ನಂತರ ಮಕ್ಕಳು ಅಂದು ಶಾಲೆಯಲ್ಲಿ ಇರುವುದಿಲ್ಲವೆಂದು ತಿಳಿಯಿತು. ನಾವು ಪಾಠಮಾಡುವ ವಿದ್ಯಾರ್ಥಿಗಳು ಅಂತರಶಾಲಾ ಕ್ರೀಡಾಕೂಟಕ್ಕೆ ಧಾರವಾಡಕ್ಕೆ ಹೋಗುವರು ಎಂದು ತಿಳಿದು ಬಂತು. ಹೀಗಾಗಿ, ಧಾರವಾಡದಲ್ಲೇ ಈ ಅಚ್ಚರಿಯ ಭೇಟಿಗೆ ಹೊರೆಟೆವು.

1

ಧಾರವಾಡದ ಕರ್ನಾಟಕ ವಿಶ್ವವಿದ್ಯಾಲದ ಆವರಣದಲ್ಲಿರುವ ರಾಣಿ ಚೆನ್ನಮ್ಮ ಕ್ರೀಡಾಂಗಣದಲ್ಲಿ ಭೇಟಿಯಾದಾಗ ತೆಗೆದ ಚಿತ್ರವಿದು. ಎಲ್ಲ ಚಿಣ್ಣರನ್ನು ಮುಖತಃ ನೋಡಿ, ಭೇಟಿಯಾದಾಗ ಅವರ ಕಣ್ಣುಗಳಲ್ಲಿನ ಉಜ್ವಲ ಪ್ರತಿಭೆ ನನ್ನ ಮನಸಿನಲ್ಲಂತೂ ಪುಳಕವನ್ನುಂಟು ಮಾಡಿತು. ಪ್ರತಿಯೊಬ್ಬರ ಪ್ರೀತಿ, ಪ್ರೇಮ, ವಿಶ್ವಾಸಕ್ಕೆ ನಾ ಮನಸೋತು ಹೋದೆ. ಆ ಮುಗ್ದತೆಯ ಹಿಂದೆ ಅಡಗಿರುವ ಭವಿಷ್ಯ ಭಾರತವನ್ನು ರೂಪಿಸುತ್ತಿರುವ ಅವರ ಗುರುಗಳು ಮತ್ತು ಗುರುಮಾತೆಯರನ್ನು ಭೇಟಿಯಾಗುವ ಸದಾವಕಾಶ ದೊರೆಯಿತು.

ಕಳೆದೆರಡು ಸಲಕ್ಕಿಂತ ಈ ಭೇಟಿ ಹೆಚ್ಚು ಮನಸ್ಸಿನ ಆಳದಲ್ಲಿ ನಾಟಿದಂತಿದೆ. ಬಹುಷಃ ಹೊತ್ತಿಗೆಗಳ ಹೊರೆಯಿಲ್ಲದೆ, ಸ್ವಚ್ಚಂದವಾದ ಪರಿಸರದಲ್ಲಿ ವಿಹರಿಸುತ್ತಿರುವ ಆ ಮನಸ್ಸುಗಳು ಹೆಚ್ಚು ತೆರೆದುಕೊಂಡಿರುವಂತೆ ಭಾವಸವಾಯಿತು. ಪ್ರತೀ ಬಾರಿಯೂ ಏನನ್ನಾದರೂ ತೆಗೆದುಕೊಂಡು ಹೋಗುವಂತೆ, ಈ ಬಾರಿ ಅಮೆರಿಕಾದಿಂದ ತಂದ ವಿಶೇಷ ಬೆಳಕಿನ ಚೆಂಡುಗಳನ್ನು ಪ್ರತಿಯೊಬ್ಬರಿಗೂ ಹಂಚಿದೆವು. ಈ ವಿಶೇಷ ಚೆಂಡುಗಳನ್ನು ಅಮೆರಿಕಾದ ದೃಗ್ವಿಜ್ಞಾನ ಸಂಘ (OSA) ದವರು ಜನರಲ್ಲಿ ಬೆಳಕಿನ ಕುರಿತು ಆಸಕ್ತಿ ಮೂಡಿಸಲು ರೂಪಿಸಿದ್ದಾರೆ. ಈ ಬೆಳಕಿನ-ಚೆಂಡುಗಳು ನಮ್ಮ ಈ ಪುಟ್ಟ ಮನಸ್ಸುಗಳಲ್ಲಿ ಇನ್ನೊಬ್ಬ ಚಂ.ವೆಂ.ರಾಮನ (CV Raman) ಆಗುವಂತೆ ಕಿಡಿ ಹೊತ್ತಿಸಲೆಂದು ಆಶಿಸುತ್ತೇನೆ.

ನನ್ನ ವಿದ್ಯಾರ್ಥಿಗಳೊಂದಿನ ಭೇಟಿ ಅಲ್ಪಕಾಲವಾದರೂ, ಮನಸ್ಸಿನಲ್ಲಿ ಚಿರಕಾಲ ಉಳಿಯುವುದು. ಕೊನೆಯದಾಗಿ, ನಾನು ಹೊರಡಲು ನಿಂತಾಗ, ಕ್ರೀಡಾಂಗಣದ ತುದಿಯವರೆಗೆ ಬಂದು ಬಿಳ್ಕೊಟ್ಟ ನನ್ನ ಪ್ರೀತಿಯ ವಿದ್ಯಾರ್ಥಿಗಳ ಚಿತ್ರ ಇಲ್ಲಿದೆ

2

ಭಾರತೀಯ ಬಾಹ್ಯಾಕಾಶ ಸಂಸ್ಥೆಯ ಚರಿತ್ರೆ

ಭಾರತೀಯ ಬಾಹ್ಯಾಕಾಶ ಸಂಸ್ಥೆಯ ಸ್ಥಾಪನೆ, ಅದರ ಬೆಳವಣಿಗೆ ಮತ್ತು ಇಸ್ರೋ-ಕುಟುಂಬ ನಡೆದು ಬಂದ ಹಾದಿಯ ಸಂಪೂರ್ಣ ಚಿತ್ರ ಈ ಪುಸ್ತಕದಲ್ಲಿ ದೊರೆಯುತ್ತದೆ. ವಿಕ್ರಮ ಸಾರಾಭಾಯಿರವರ ದೂರದರ್ಶಿತ್ವದಲ್ಲಿ  ಜನ್ಮತೆಳೆದ ಭಾಬಾ-ಸಂಸ್ಥೆಯ ಪ್ರತೀ ಹೆಜ್ಜೆಯೂ ಕಣ್ಣಿಗೆ ಕಟ್ಟುವಂತೆ ಈ ಪುಸ್ತಕದಲ್ಲಿ ಮೂಡಿ ಬಂದಿದೆ. ಇತಿಹಾಸದ ಜೊತೆಜೊತೆಗೆ ಇಸ್ರೋ ಯೋಜನೆಗಳ ತಾಂತ್ರಿಕ ಅಂಶಗಳನ್ನು ಕುರಿತಾಗಿಯೂ ಬಹಳಷ್ಟು ಲೇಖನಗಳಿವೆ.

ನಮ್ಮ ದೇಶದ ಬೆಳವಣಿಗೆ ಮತ್ತು ರಕ್ಷಣೆಯಲ್ಲಿ ಇಸ್ರೋ ಪಾತ್ರ ದೊಡ್ಡದಾಗಿರುವುದಲ್ಲದೇ ಇನ್ನೂ ಹೆಚ್ಚುತ್ತಲೇ ಹೋಗುತ್ತಿರುವುದು. ಸಾರಾಭಾಯಿರವರ ಎಲ್ಲ ಕನಸುಗಳನ್ನು ಸಾಕಾರಗೊಳಿಸಿ ೨೧ನೇ ಶತನಮಾನಕ್ಕೆ ಅನುಗುಣವಾಗಿರುವ ಮಹತ್ತ-ಯೋಜನೆಗಳನ್ನು ಕೈಗೆತ್ತಿಕೊಳ್ಳುತ್ತಿರುವ ನಮ್ಮ ಬಲಾಢ್ಯ ಬಾಹ್ಯಾಕಾಶ ಸಂಸ್ಥೆಯ ಕುರಿತು ಹೆಚ್ಚೆಚ್ಚು ತಿಳಿಯಲು ಈ ಆಸಕ್ತಿದಾಯಕವಾದ ಪುಸ್ತಕವನ್ನು ಓದಲು ಮರೆಯದಿರಿ.

red